Gero eta hurbilago dago baztandarren besta haundia, astebete eta egun batzuk baino ez dira gelditzen. Uztailaren 17an, igandearekin, eginen da Baztanarren Biltzarra eta horren aitzakian, urtero bezala, Elizondoko karrikak jendez, musikaz eta kolorez beteko dira. Joan den urtean hartutako erabakiari segituz, larunbatarekin gaupasarik ez antolatzea erabaki du Baztandarren Biltzarra elkarteak.
11:30ean hasiko da orga apainduen desfilea. Baina horrez gain, eguerdira bitarte eta aurten berrikuntza gisa, artisau erakusketa izanen da Axular Karrikan. 14:00etan Mutildantzak izanen dira eta ondotik, herri bazkaria eginen da Merkatuko zelaian. Bazkalondoko jaialdiaren txanda izanen da gero: musika, Muxikoak, Larraindantzak eta Trikidantz taldearen emanaldia. 20:00etatik aitzinera, Laiotz taldearekin dantzaldia izanen da eta ondotik, DJ-ak ariko dira. Egun osoan Baztandarren Biltzarra karpa irekia egonen da.