Uztailaren 8an, ortzirala, kamioi batek su hartu zuen Belateko tunelaren irteeran Iruñako bidean. Eragindako kalteak handiak izan dira eta Nafarroako Gobernutik jakinarazi dutenez aste batzuetako lana ekarriko du konponketak egiteak. Data jakin bat erran ez duten arren, denboraldi batez itxita egonen dela aurreikusi dute.
Kamioiak 17:00 aldera hondatu eta su hartu zuen, tuneletik ateratzeko 300 metro falta zituenean. Kamioi gidaria ospitalera eraman behar izan zuten kea arnasteagatik. Irteeratik gertu egoteak azkartu egin zuen gidariaren artatzea baita larrialdietako plana martxan jartzea ere.
Uztailaren 9an, larunbata, teknikoak bertaratu eta kalteak aztertu zituzten. Dirudienez suak asfaltozko tela, kontrolerako instalazioak, larrialdietarako telefonoak eta errepidea kaltetu ditu gehienbat.
Tuneleko konponketa lanak irauten duten bitartean, Iruñera joateko Belateko bide zaharretik edo A-15 errepidetik joan beharko da.