Mendia maite dutelako erabaki zuten Iñaki Iriarte amaiurtarrak eta Andoni Etxeberria erratzuarrak Himalaya aldera joatea. Iruñeko agentzia batera jo zuten horretarako eta bortz laguneko taldea osatu zuten: iruñear eta gasteizar banarekin eta madrildar batekin. Duela gutti telebistan ere ikusiak ditugu biak, Edurne Pasabanen espedizio bateko erreportaje batean, alegia.
Prestaketa moduan, lehenagotik mendian «pixka bat» ibili eta apirilaren 8an abiatu ziren Nepalera. Hala kontatu digu Iriartek. Kantmandu hiriburura ailegatu eta handik Luklara joan ziren hegazkinez. Luklatik abiatu zuten oinezko ibilbidea. Bailara batetik igo eta bertze batetik jeitsi ziren eta tarte horretan 5.000 metrotik goiti dituzten hiru gailurretara ailegatu ziren: Gokyo Ri (5.357 metro), Chola pass (5.420 metro) eta Kala Pattar (5.545 metro). Azken honetatik, Everest (8.872 metro) eta Lhotse (8.501 metro) bezalako tontorrak ikusteko aukera izan zuten. Behin ibilbidea akituta, handik Luklara itzuli ziren.
20 egun pasatu zituzten Nepal aldean eta erran digutenez, kontent ibili ziren amaiurtarra eta erratzuarra.