Ekainaren 9an hasi zen idazkari posturako oposaketa proba geldiarazi du udalak. Udal berriak jakinarazi duenez, aitzineko legealdia akitzear zela, idazkari lanpostua bitarteko gisa eta administrazio kontratuarekin betetzeko oposizio-lehiaketa abiatu zen urgentziazko lehentasuna emanez. Prozesua plantilla organikoan euskararen betekizuna aldatu gabe abiatu zuen, hau da, euskara jakitea derrigorrezkoa izan gabe eta meritua bakarrik izanik, 100 puntutik 2 bakarrik kontatzen zituela. Udalak gogorazi nahi du martxoaren 4an NaBairen udal gobernuak Euskararen Ordenantzat onartu zituela, «Baztango Udalak kontratzen zituen langileek euren lan jarduera euskaraz eta gaztelaniaz egiteko gaitasuna izan beharko zutela zehaztuz».
Ekainaren 20an egiteko zen ezohiko plenoan idazkari lanerako euskara menperatzea betekizun bihurtu dute. Plantillaren aldaketari behin-behineko onespena eman ondotik oposizio-lehiaketa berria abiatuko dute, euskararen betekizuna betetzen duena. Tarte honetan, legeak ezartzen duen bezala, bertze herri bateko idazkari bat gaituko dute Baztango Udalean egin behar diren osoko bilkuretan «atzeratu ezin diren aferak aitzinerat ateratzeko».