UPN alderdi erregionalistak baino 37 boto gutiago lortu arren, Ezkerrarekin lortutako akordioari tarteko, Bilduko Garbiñe Elizegi lekaroztarra izanen da heldu diren lau urteotan alkate. Maiatzaren 22ko hauteskundeetan, bosna zinegotzi lortu zituzten UPNk eta Bilduk. Baina aipatu bezala, Ezkerrarekin akordioa lortu zuen Bilduk, eta honek lortutako bi zinegotziek Elizegiren alde bozkatu zuten ekainaren 11ko kargu hartze ekitaldian. NaBai 2011ko zinegotziak, bere aldetik, zurian bozkatu zuen «zalantza handiak dituelako Bilduk aurkeztutako gobernu proposamenaren bideragarritasunaz». Halaxe adierazi du alderdiak prentsara igorritako oharrean.
Horrenbertzez, ordezkari hauek osatu dute udalbatza berria: Bilduko Garbiñe Elizegi, Mikel Ortega, Santi Esarte, Maitane Azkarate eta Jon Elizetxe; UPNko Begoña Sanzberro, Mª Carmen Iribarren, Mª Isabel Olabe, Leopoldo Jaen eta Jose Mª Garmendia; Ezkerrako Florentino Goñi eta Iñigo Iturralde eta NaBai 2011ko Pello Iriarte.