«NaBaik gobernatzen duen Udalaren egoera ekonomikoa larria» dela erranez UPNk egindako adierazpenei ohar batekin erantzun dio NaBaik. Honen arabera, «Udala zorpetze mailaren azpitik dago». Kontuhartzailetzaren Txostenak hala erakusten duela gaineratu du NaBaik, eta «2011ko aurrekontuaren onarpenerako txostenean agerian gelditzen dela». Orain arte argitaratutako Kontuen Ganbararen Ikuskaritza Txostenetan, «Udalaren egoera ekonomiko normalaren berri ematen dela» ere ageri da idatzian. «Udala eta Baztango gizartea ez gaude jarduera ekonomikoa eta enplegua murriztu dituen krisialdi ekonomiko orokorraren egoeratik kanpo –dio NaBaik–, baina gure borondatekoak ez diren arrazoiengatik da». Gisa berean, ekimen bideragarri eta arduratsuak proposatzeko «gogotsu lan egiten» ari dela ere jakinarazi du, eta UPNri, berriz, mezu hauxe: «akusazio faltsu hau behar den aldietan ezeztatuko duela, ziuraski hauteskunde kanpaina dela eta, beharko delako».
Sortu berri duen blogaren berri ere eman du: www.baztanbidasoanabai.wordpress.com.