Otsailaren 21eko Nafarroako Aldizkari Ofizialean, Aroztegia alderdian egin nahi den proiektuaren harira, Udal Planaren aldaketaren behin-betiko onespena argitaratu zuen Udalak. Aroztegia... eta gero zer? plataformak, ordea, Udalak argitaratutako behin betiko onespenari helegitea paratzea erabaki du, «Udala ez delakoz erabaki hau hartzeko organo konpetentea eta tokiz kanpo dagoelakoz». Plataformak oroitarazi duenez, «behin betiko aldaketa egitea Nafarroako Gobernuari dagokio bakarrik». Prentsara igorritako oharrean dio, «behin betiko onespen hau Nafarroako Gobernuak jadanik aldaketa honi 2010eko irailaren 13ko 162/2010 Etxebizitza eta Lurralde Antolaketako Kontseilariaren Foru Aginduaren bidez eman ziola. 2010eko urriaren 13an Udaleko osoko bilkura arruntean ez zen inongo behin betiko onespenik eman aipatutako aldaketari, Udalari ez dagokiolakoz, Udala Foru Aginduaren edukiez jabetu bakarrik egin zen». Egoeraren aitzinean, plataformak helegitea jarriko du Nafarroako Auzitegi Goreneko Administrazioarekiko Auzien Epaitegian: «Udal Planaren aldaketa honek legea betetzen ez duela uste dugulakoz, inposatutakoa eta herritar gehiengoaren interesen aurkako izateaz gain». Lerrook idazterakoan kasua tramitatzen ari ziren eta epaiketa oraindik hasi gabea zen.
Aroztegia proiektu honekin «denbora eta baliabide publikoak alferrik gastatzen» ari direla leporatu dio Udalari, «herritarrak nahasi eta manipulatzea helburu bakarrik duen alferrikako tramiteetan».