Joan den urteko azaroan estreinatu zen Elizondoko liburutegi berriaren argindar eta berogailu gastuek kezka sortu dute Baztango Udalean eta eztabaida piztu zen otsailarem 14ko udal batzarrean NaBai eta UPNko zinegotzien artean. Izan ere, hileroko gastua kasik 8.000 eurora ailegatu da (azkeneko erreziboa 7.729,11 eurokoa izan zen). NaBaiko ordezkariek aipatu zutenez, “zer gertatzen ari den aztertzen ari gara, eta dakigunean, soluzioa emanen zaio”. UPNren ustez, aldiz, “obra gaizki egina dago, beheitiko aldetik ez dago ongi isolatua eta erreka hortik pasatzen da. Horregatik ditugu honelako kontsumoak, sabaian 35 graduko tenperatura hartu arren, zolatik metro terdira 12 gradutan egoten delako”.
Oronozko pilotalekua
Oronozko pilotalekuaren inguruan Nafarroako Probintzia Auzitegiak emandako epaiak ere eztabaida iztu zuen Balleko Etxean. Frontoi honen jabetza Urrutia Fundaziotik Haizea 2.002 enpresara pasatu zen, bertan pisuak eraikitzen hasi zirenean. Halere, jabetza pribatua izanagatik, erabilera Baztango Udalaren eta herritarren esku dago 1998. urtetik hasita bertze hirutan hogeita hamabortz urtez. Kontua da, Haizea 2.002 enpresak porrot egin zuela eta bere akreedore edo hartzekodun batek frontoiaren eta ondoko lur-eremuaren jabetza eskatzen duela. UPNko zinegotziek aipatu zutenez, “bere garaian erran genuen udalarena ez zen frontoia moldatzea baino hobe zela frontoi berria egitea, eta orain datoz arazoak”. NaBairen ustez, “frontoiaren erabilera bermatua dago, ez baita bere garaian sinatutako hirigintza hitzarmena zalantzan jartzen. Balleko Udalak urratsak eman beharko ditu orai frontoiaren jabetza eskuratzeko”.