Baztan-Errekako XI. paxaka txapelketako finaleko protagonista zein izanen diren erabaki da larunbat honetan, Iruritako Aranabia pilotalekuan jokatu ziren finalerdietan. Aurtengoan zortzi hirukoteetatik sei Iruritakoak ziren (Doneztebe eta Oizek bana aurkeztu dute) eta finalerdietan lauak herrikoak ziren. Beraz, finalistak Iruritakoak izanen zirela jakinik, zein izanen ziren jakitea falta zen.
Hala, lehenbiziko finalerdi estuan, Irurita Ek (Miguel Garate, Joseba Urtasun eta Cesar Sarratea) 9 eta 8 irabazi zion Irurita Dri (Mikel Ballarena, Xabier Barberena eta Miguel Bidegain). Bigarren finalerdia ere ikusgarria suertatu zen eta Irurita Gk (Jesus Etxenike, Oskar Urrutia eta Karlos Garaikoetxea) 9 ea 6 irabazi zion Irurita Bri (Xabier Bazterrika, Iñaki Zabaleta eta Mitxel Etxenike).
Finala eta hirugarren posturako lehia otsailaren 19an
Gauzak honela, otsailaren 19an, larunbatean jokatuko dira txapelketa honetako hondar partidak Iruritako Aranabia pilotalekuan. 17:00etan hirugarren postua eskuratzeko lehia izanen dute Irurita D eta Irurita Bk eta segidan, 18:00etan, finala jokatuko dute Irurita E eta Irurita Gk.
Txapelak eta sariak banatu ondotik, 21:00etan afaria izanen da Iruritako Olari jatetxean.