Udalak 8.723.035 euroko diru-sarrera eta irteerak izanen ditu aurten, iaz baino %12,21 guttiago. Hala onartu zuen urtarrilaren 12ko batzarrean NaBairen aldeko 7 botoekin eta UPNren kontrako 5ekin. Kopuru horretatik, Udalari berez 8.065.730 euro dagozkio: 622.004 euro Baztan Ikastolaren aurrekontua baita eta 120.300 euro Francisco Joaquin Iriarte zahar-etxearena.
Gastu nagusienak zerbitzuak eta ondasun arruntak dira (2.405.803 euro), langilegoaren gastuak (2.191.460 euro) eta inbertsioak (1.831.900 euro). Diru sarrera handienak transferentzia arruntekin lortuko dira (2.977.550 euro), zerga zuzenetatik (1.973.000 euro) eta transferentzia eta bertze diru sarreretatik (1.730.485 euro).
Inbertsioak
Inbertsioetako dauden 1.831.900 euroetatik, Udalak 546.700 euro ordaindu beharko ditu. Nagusiena Elizondoko ur sarearen lehen fasea izanen da, 770.000 euro, baina osorik diruz lagundua izanen da (%80 Nafarroako Gobernuak eta %20 Iturri-Ederra elkarteak).
Horrez gain, 300.000 euro oihan lanetara bideratuko dira (%80 Gobernuak eta %4 Nafarroako Kutxak ordainduko du); 213.000 euro zaborrarendako kamioia erostera (149.100 euroko subentzioa) eta abeltzaintzako toki azpiegituretara 160.000 euro (%51 Gobernuak ordaindua). San Francisco Javier ikastetxeko transformadorea kentzeko 139.000 euroko gastua izanen da. Horiez gain, hauek dira aurreikusi diren bertze inbertsioak: azterketa eta proiektuak (90.000 euro); ikastetxeetako obrak (50.000 euro, Gobernuak %65eko laguntza emanen du); Gartzaingo batzarre gela (30.000 euro); haurtzaindegi zaharra (35.000 euro); kale izendegi berriaren seinalizazioa (15.000 euro); haur parkea eta karrikako altzariak batetik eta pisten egokitze lanak bertzetik (bakoitzean 10.000na euro); bertzelako altzariak (3.000 euro) eta Haur Eskolako altzariak eta Musika Eskolako ekipamendua (1.000na euro).
Lau Urteko Azpiegitura Planaren barrenean, 2012an Zigako hilerrian eta Almandozko zeharbidean lanak eginen dira, Amaiurko ur depositoa ere eginen da, baita Iruritako ur sarearen bigarren fasea ere. Bideak moldatu eta zaborrontziak erosi ere bai, bertzeak bertze.
DATUA
770.000 EURO
kostako da Elizondoko ur sarearen lehen fasea. Osorik diruz lagundua izanen da, %80 Nafarroako Gobernuak eta %20 Iturri Ederra elkarteak.