Baztanen bizi, bertan lan egin lelopean, manifestazioa eginen da Elizondon larunbat honetan, urtarrilak 22, ELA, LAB eta EHNEk deituta, euskal gehiengo sindikalaren ordezkari gisara. Manifestazioa 12:00etan abiatuko da Lur dantzalekuaren paretik. Urtarrilaren 12an Elizondoko Arizkunenean eskainitako prentsaurrean deialdia egin zuten sindikatuek aipatu zutenez, «Baztanentzako etorkizun duin bat aldarrikatzeko eta Baztanek bizi duen egoera salatzeko» eginen da ekitaldia.
ELAko Xabier Perezek aipatu zuenez, «gaur egun 1.140 pertsona daude zerrendatuak Doneztebeko INEMen, orain urtebete baino %8,3 gehiago. Bi urtetan eskualdeko langabezia tasa bikoiztu egin da, kontutan eduki gabe denbora baterako EREak pairatzen ari diren 2.000 langile inguru». Nafarroako Gobernua praktikan enpresen administrazio kontseiluen bertze adar bat dela adierazi zuen Perezek, «eta ez du inolako arazorik izaten kaleratze kolektiboak sinatzeko Funveran, Saveran eta berriki Marmoles del Baztanen ikusi genuen bezala. Hala ere plantila murrizketa guztiak ez dira EREen bidez egiten, badaude bertze hainbat modu plantila murrizteko baina hauek ez dira berrietan agertzen. Adibide bezala, zenbat langile hasi ziren hain fama handia hartu zuen Elgorriagako bainuetxean eta zenbat daude orain?».
EHNEko Bittoriano Jauregi, bere aldetik, nekazaritza krisiaz aritu zen: «Lehengaien espekulazioak eta ekoizteko betebehar zorrotzek ekoizpen kostuak goratu ditu, nekazariak bere prezioak paratzeko boterea erabat galdu du, eta kontrolik gabe inportaturiko produktuekin eta auskalo nola ekoiztutakoekin konpetitu behar du merkatuan». Bere hitzetan, Europako Nekazal Politika ez da hemengo gisako mendi aldeko baserrien babesle, «enpresa multinazionalen eta esportaziorako ekoizle handien laguntzaile baizik». Nafarroako Gobernuari dagokionez, «zementuan bota ditu edo lagunen artean banatu ditu sosak nekazaritzaren izenean», adierazi zuen Jauregik, baita hau ere: «honek guztiak gure eskualdean ere lan postuen galera, herrien hustea eta herri batentzat hain garrantzitsua den elikagai burujabetzaren galera ekarri du».
LABeko Koldo Saenzek azaldu zuenez, «sektore finantziaroari milaka milioi euro eman ondotik, lan erreforma basati batekin heldu dira, ez dira konformatzen eta inoiz ikusi gabeko lapurreta egin nahi diete pentsionistei. Erraten dute merkatuek agintzen dutela, baina guk badakigu hori ez dela horrela eta erreforma honek azalpen bakarra dauka: banketxeen interesa pentsio plan pribatuetan». Baztan langabeziaren espiral honetatik atera behar dela pentsatuz deitu dute manifestaldia.
Greba orokorra
Urtarrilaren 27ko greba orokorrean parte hartzeko deia ere egin dute ELA, LAB eta EHNEk.