Baztanek baditu Ordenantza Berriak. Batzar Nagusiak urtarrilaren 3an egindako isilpeko bozketan aldeko 21 boto eta kontrako 9 jaso zituen.
1967tik ukitu gabe zeuden ordenantzen eguneratze prozesua bi urtez luzatu da. Hasierako ordenantzak 1603an eginak dira, baina lehendik ere baziren Baztango administrazioa eta herrilurren kudeaketa, erabilera eta aprobetxamenduak gidatzen zituen araudirik.
Batzar Nagusiak berak izendatutako batzorde bat aritu da burubelarri orain onartu den testua egokitzen. Herrilurren aferean lan handia egin dela iritzi zioten batzarkideek, baina ordenantzen kontra zeudenak ere baziren, hala nola, Elizondo, Aniz, Oronoz eta Arraiozko alkateak, herri horietako batzarretan ordenantza berrien kontrako botoa eman baitzen. «Aurrekontuak egiterakoan ez da herrien parte-hartzeaz ja agertzen, administrazio guzia berdin gelditzen da eta ez zaio konpetentzia gehiago ematen Juntari, alderantziz baizik, eta Baztanen dirua gaizki kudeatu da», zioten alkate hauek.
NaBairen ustez, «batzarre batzuetan eta hemen, ezker abertzalearen estrategia bat egon da, ez bakarrik Ordenantzen aferean».
Iruritako kasuan, alkatea kontra bozkatzearen alde bazegoen ere, herritarrei ordenantzen kopia eman eta hauek aztertu ondotik, baiezkoaren alde agertu ziren batzarrean, «baina puntu batzuk gehixeago landu behar direla» uste dute.
Virginia Aleman Baztango alkateak gogorarazi zuenez, «ez dira behin betiko edo itxitako ordenantzak, etengabeko garapena izanen dute, baina oinarria eguneratua dago».
IRURITA
Iruritan, alkatea kontra bozkatzearen alde egon arren, batzarrean herritarrak alde agertu zirelako, berak ere aldeko botoa eman zuen Batzar Nagusian.