Rakel Rico Berako argazkilariak eta EHNE sindikatuak elkarlanean osatutako Emakume baserritarren begirada erakusketa Elizondoko Arizkunenea Kultur Etxean ikusgai dago urtarrilaren 22ra arte. Urtarrilaren 17ko San Anton Eguna aprobetxatuz egin zen aurkezpena eta argazkiak ikusteaz gain, abeltzain eta nekazariek prestatutako elikagaiak dastatzeko aukera ere izan zen. Aurkezpen ekitaldian Juana Mari Gortari, Elizondoko abeltzaina eta EHNE-Nafarroa sindikatuko ordezkaria Baztan-Bidasoaldean, Maider Azkarate aniztarra, sindikatuko berdintasun arloa lantzen duen EBEL taldeko juntakidea eta Mikel Altzuart Arizkungo abeltzain ekologikoa eta EHNE-Nafarroako batzordeko kidea izan dira.
60 argazki
Emakume baserritarrei egindako 60 argazkirekin osatutakoa da erakusketa, eta emakume baserritarren lana jendeak ezagutu eta baloratzea, zerbitzu falta salatzea eta lehengo baserriko emakumeei omenaldia egitea dira erakusketaren helburuak. Argazkietan ageri diren 24 emakumeetatik aunitz eskualdekoak dira: Martina Ormart (Elizondo), Josefa Loiarte (Zubieta), Marian Aranibar (Bera), Maider Azkarate eta Igone Oteiza (Aniz), Lourdes Argain (Narbarte), Mariado Iturralde (Donamaria) eta Juana Mari Gortari (Ziga). Adin eta alor desberdinetakoak dira: esnetako edo haragitako behiak dituzte batzuek, ahuntzak edo oiloak bertzeek… Eta argazkiez gain, emakumeen esaldi batek laburbiltzen du bakoitzaren egunerokoa.