Ordenantzek diotenari segituz, eta bi urtetik behin egiten den bezala, abenduko hirugarren igandean, abenduaren 19an, egin ziren herrietako alkate berriak izendatzeko hauteskundeak Baztanen. Baztango herrietan egina zen deialdia, baina 11tan baino ez dira aukeratu alkateak, horietatik lau berriak, eta zazpi lehengoak. Errege Egunean, ortzegun honetan, hartuko dute arduradun berriek kargua. Egun horretan emanen dira urteko kontuak ere bai.
Almandoz
Luis Roldan izanen da bertze bi urtez alkate segituko duena.
Amaiur
Julian Rekalderentzat ez da lehen aldia alkate karguan eta hor segituko du lanean.
Aniz
Asier Maritorenak segituko du orain arte bezala, alkate izaten.
Arizkun
Abenduaren 19an, ez zen inor aurkeztu Juan Kruz Iriartek azken urteotan bete duen kargua ordezkatzeko eta Urteberri Egunean egitekoa da berriz batzarrea.
Arraioz
Sotero Etxandik segituko du alkate lanetan.
Azpilkueta
Miguel Mari Ariztia legealdi honetan aukeratu den alkate berrietako bat da.
Berroeta
Arantxa Zelaia izan da orain arte alkatea, baina aldi honetan ez da inor aurkeztu.
Elbete
Azken lau urteetan alkaterik eduki gabe egon ondotik, Pedro Goienetxek hartu du ardura.
Elizondo
Bere bigarren legegintza beteko du Xabi Torresek alkate lanetan. Elizondoko batzarrea izan zen jendetsuena, 50 bat lagun agertu baitziren Herriko Etxera
Erratzu
Xabier Ospital izanen da alkate berria, orain arte Juan Jose Bidartek izan duen ardura bere esku geldituko da.
Gartzain
Hautagairik gabe gelditu ziren hauteskundeen lehen deialdian, Jose Luis Elizegiren ordezkorik gabe. Urteberri Egunean egitekoa dute berriz ere batzarrea.
Irurita
Pello Obregozo izanen da berriz alkatea.
Lekaroz
Agintaldi honetan aukeratu den bertze alkate berria da Jesus Angel Gartzia. Jabier Elizalderen ordez ariko da.
Oronoz Mugairi
Bittor Elizagoienek segitzeko asmorik ez duela adierazi ondotik, hautagirik gabe gelditu zen abenduaren 19an.
Ziga
Pablo Zenoz izanen da hurrengo bi urteetan ere alkatea.