Elbeteko bizilagunek lan-taldea osatu dute eta, Baztango gainerako herrietan bezala, abenduan eginen diren herrietako alkateak eta kargodunak aukeratzeko hauteskundeetan hautagaitzaren bat aurkeztea izanen dute helburu. Izan ere, azkeneko bi legealditan ez dute alkaterik izan Elbeten, beraz, lau urte daramazkite Batzar Nagusietan ordezkaririk izan gabe.
Joan den asteburuan biltzekoa zen Elbeteko lan taldea eta bertatik zozketa bidez aukeratzekoa zuten 2011-2012 urteetan alkate izateko hautagaia. Bertze zenbait erabaki ere hartu dituzte elbetearrek. Bertzeak bertze, etxez etxe ur-kontadoreak hartzea eta mantenimendua zenbat kostako litzakeen jakiteko estudioa enkargatuko dute, kontsumo arduratsuagoa lortzeko.