Marmola eta granitoarekin lanean aritzen den Oronoz-Mugairiko Marmoles del Baztan enpresak 17 langile kaleratu nahi dituela jakinarazi du LAB sindikatuak ohar bidez. Bere garairik onenean 50 langile eduki zituen lantegi honek 32 ditu gaur egun, eta LABek azaldu duenez, «orain bi urte krisi ekonomikoak astindu zigunean plantila murrizten hasi zen».
Zazpi langile kaleratu zituen enpresak hasieran, eta ondoren erregulazio txostena etorri zen.«ERE hori langileekin adostu zuenean urte batez inor ez kaleratzeko konpromisoa hartu zuen –dio LABek– eta lau hilabete beranduago 17 langileren kaleratzea paratu du mahai-gainean». Horren harira, langileak ez kaleratzeko hartutako konpromisoa ez duela bete leporatu dio sindikatuak, «bere gestio kaxkarraren ondorioz honat ekarri gaituenez, ez dugu onartuko gure lankideen kaleratzerik».
LABen irudiko, enpresak badu «produkzioaren jaitsiera agoantatzeko gaitasuna», eta egoera hobetzeko «bere aldetik ez deus paratu» izana kritikatu du. Egoeraren aitzinean, mobilizazioak iragarri dituzte: asteazken honetan greba mugagabea hasiko dute.