Baztandarren Biltzarra Elkarteko kideek «zalantza handiak» agertu dituzte Baztandarren Biltzarra eguna eta elkarteak urte guzian egiten dituen hainbat ekintza antolatu eta segida izanen ote duten. Elkartekideek beren borondatez esfortzu eta lan handia egiten dute eta aurten, kideetako aunitzek elkartea utziko dute eta inor berririk sartu ezean, «zalantza horiek areagotu bertzerik ez dira eginen», dio Baztandarren Biltzarrak prentsara igorritako ohar batean. Hortaz, elkartean lan egiteko deia egin du: «orain inoiz baino gehiago Baztandarren Biltzarrak zuen beharra du!». Bertzalde, aurtengo Baztandarren Biltzarraren balorazio positiboa egin du oro har, baina zenbait aferen gaineko xehetasunak ere argitu dituzte. Prentsara bidali duten artikulua Irakurleak Mintzo atalean irakur daiteke osorik.