Delitu arinen bat tartean dagoenean, espetxe zigorraren alternatibetako bat gizartearentzat lan egitea izaten da. Eta Baztanen halaxe egiten dute batzuek, trafikoaren segurtasunaren kontrako delitua egiteagatik edo multak ez ordaintzeagatik zigorra bete behar dutenean.
2009an Udalak eta Nafarroako Espetxeetako Gizarte Zerbitzuek sinatutako hitzarmenaren bidez, Baztanen gizartearendako lanak eginez bete dezakete zigorra, espetxearen ordezko neurri gisa. Izan ere, Udalaren irudiko, «hagitz garrantzitsua» da baztandarrei zigorra inguruan betetzeko eta hemengo erakundeek kudeatutako jardueretan aritzeko aukera ematea. Hala, 15 dira orain arte gaztigua gisa honetara bete duten baztandarrak.
Zigorra betetzeko lanak toki hauetan eskaintzen zaizkie: Elizondoko Francisco Joakin Iriarte zahar-etxean, Giltxaurdi udal igerilekuan, mantenimendu lanak, garbiketa lanak, basoko lanak... «Horrelako lanak Baztanendako onuragarriak dira», adierazi dute Udaletik.