DATUA 11:00etan abiatuko da orga apainduen desfilea
Gutti gelditzen da baztandarren besta haundirako, astebete eta egun batzuk bertzerik ez. Uztailaren 18an, igandearekin, eginen da hain egun berezia den Baztandarren Biltzarra besta. Urtero bezala, Elizondoko karrikak jendez, musikaz eta kolorez beteko dira.
Aurtengoak, ordea, badu berezitasun bat: Elizondoko Foru Plazako obrek azken momentura arte airean eduki baitute Baztandarren Biltzarra. Azkenean egin, eginen da, baina aldaketa batzuekin.
11:30ean hasiko den orga apainduen desfilearen ondotik, 14:00etan Mutildantzak izanen dira Laxo plazan. 14:30ean herri-bazkaria eginen da Merkatuko zelaian eta ondotik, bazkalondoko jaialdia: bertsolariak, abeslariak, Muxikoak, Larraindantzak eta Trikidantz taldea. 20:00etatik aitzinera, Laxo plazako karpan dantzaldia eskainiko duena Laiotz taldea izanen da eta ondotik DJ-ak ariko dira. Igande osoan Baztandarren Biltzarra karpa Laxo frontoian irekia egonen da.
Aipatzekoa, bertzalde, larunbatarekin ez dela gaupasarik eginen.
Kartela
Juan Angel Perotxena elizondarrak egindako kartelak iragarriko du aurtengo Baztandarren Biltzarra. Elizondoko plazako obrak tarteko, kartel lehiaketa antolatzeko ez du denborarik izan Baztandarren Biltzarra Elkarteak eta horregatik, kartelaren diseinua enkarguz egin da. Antolakuntzatik bere lana eskuzabaltasun osoz egin duela azpimarratu nahi izan dute.