DATUA 19:00etan hasiko da manifestazioa Elizondoko karriketan.
Baztan bizirik nahi dugu!, Herriaren hitza errespetatu! eta Munoa eta Aroztegia gelditu!. Hiru lelo horiekin manifestazioa deitu dute Amaiurko herriak eta Aroztegia... eta gero zer? plataformak. Uztailaren 17an, larunbatarekin, izanen da, 19:00etan Elizondon.
‘Baztan bizirik nahi dugu!’
Deitzaileen irudiko, azken aldian Baztanen egiten ari diren egitasmoek «gure lurra, gure ingurua, gure biziak eta bizitzeko moduak aldatuko dituzte», eta «interes ekonomiko eta enpresarial konkretuek bulkaturik heldu dira». Alta, «guk Baztan bizirik nahi dugu. Baztanen bizi eta lan egin nahi dugu. Horretarako, sozialki beharrezkoak diren jarduerak eta kalitateko enpleguak sortuz».
‘Herriaren hitza errespetatu!’
Amaiurko Munoako harrobia eta Lekarozko Aroztegiako «pelotazo urbanistikoak» herritarren eta lurraren kontrako egitasmoak direla adierazi dute deitzaileek: «Amaiurren, harrobi egitasmoaren kontrako herri-galdeketan, %94,5 aurka agertu zen. Lekarozen, %67 Aroztegiako proiektu urbanistiko-espekulatzailearen kontra agertu zen. Non ikusi ote da herritarren iritziaren gainetik, administrazio publikoa, Udala, interes enpresarial konkretu batzuen eskutik ibiltzea?». Inposaketen gainetik, herrien eta herritarren hitza errespetatzeko eskatu dute.
‘Munoa eta Aroztegia gelditu!’
Munoan, amaiurtarren erditsua bizi den inguruan, zundaketak baimendu izana ere leporatu diete Udalari, «ondotik, hain segur, harrobia egiteko». Tokiko jendearen gainetik, Udalak «enpresa pribatu baten alde modu itsuan» jokatu duela kritikatu dute eta horregatik, harrobietatik baserrietako distantzia egiteko ordenantza eskatu dute.
Aroztegian 252 etxebizitza berri egin nahi dituztela eta, «Baztango 16. herria» izanen litzatekeelakoan daude: «Baztango lurraldearen desegituraketa bulkatu bidenabar, gisa guztietako ondorio sozial eta ekonomikoak ekarriko ditu».