Lekarozko Aroztegiako egitasmoaren kontra, maiatzaren 22an bizikleta martxa antolatu du Aroztegia… eta gero zer Plataformak, “Eman pedalazoa Aroztegiako pelotazoari” izenburupean. Larunbatean 10:30ean abiatuko da martxa Elizondoko plazatik eta Elbete, Elizondo, Lekaroz, Tellari (gosaria 11:30ean), Oharriz eta Iruritan barna ibili ondotik, Elizondora bueltatuko dira.
Aroztegiako egitasmoa Baztango interesen kontrakoa dela adierazi du berriz ere Plataformak, “eta azken aldian hain arruntak egin diren pelotazo urbanistiko bat bertzerik ez dela, hori bai, sustatzaileak ederki aberastuko dituena, baina Baztango lurraldearen desegituraketa eta ondorio sozial sakonak ekarriko dituena”. Horregatik egitasmoa gelditzeko eskatu du, “orain hilabete pare bat Baztango eragile sindikal, sozial, kultural eta politiko desberdinek egindako eskaria berretsiz”.