39 urteko emakume frantziarra hil zen maiatzaren 11n, astearte arratseko 21:45ean Zozaia inguruan, N-121-A errepidea gurutzatzen ari zenean kamioi batek harrapatuta. Hain zuzen, kamioi gidariak eman zuen abisua Nafarroako Larrialdi Agentziara eta berehala suhiltzaileak eta foruzainak joan ziren istripua gertatu zen lekura, kamioiak pisatzeko baskulak dauden ingurura. Halere, ezin izan zuten deus ere egin, Helene Simoes da Neves berehala hil baitzen.
Emakumearen gorpua Lege Medikuntzako Nafarroako Institutura eraman zuten, autopsia egiteko. Itxura batean, Helene Simoes da Neves ez da Baztanen edo inguru honetan bizi eta ez dago jakiterik nola ailegatu zen Zozaia ingurura.