Aroztegiko egitasmoa gelditu eta Baztanen herri-eztabaida abiatzeko eskatu du Aroztegia... eta gero zer plataformak.
Aroztegiako proiektua, «oroz gainetik, egitasmo urbanistiko bat» dela salatu zuen taldeak hilaren 11n egindako agerraldian: «hutsetik 252 etxebizitzako bizigune berria sortuko duena Baztanen, 750 biztanle inguruko bizigunea. Hala, golf belagia eta hotela, jokaldi urbanistikoa zuritzeko aitzakiak bertzerik ez dira, eta horretarako, aski da bertze tokietan egiten ari diren gisako egitasmoetara begiratzea: Arabako Bastidakora adibidez».
Taldearen irudiko, egitasmoak Baztango egituraketan eta lurraldearen antolaketan «ondorio nabariak» izanen ditu: «praktikan, Baztango 16. herri bihurtuko litzateke eta, horrek ondorio sozial, espazial eta ekonomiko sakonak ekarriko ditu». Horregatik pentsatzen dute azken erabakia baztandar guztiei dagokiela. Aitzitik, Udalaren jokaera «guztiz kontrakoa» izan dela kritikatu dute: «herritarrei deus galdegin gabe, egitasmoa gauzatzeko Udal Planaren aldaketa puntualari hasierako onespena eman zion».
Atxikimenduak
Hainbat dira Aroztegia... eta gero zer? plataformari atxikimendua adierazi diotenak: EHNE Nafarroa, ELA Baztan-Bidasoa, LAB Baztan-Bidasoa, Baztango Ezker Abertzalea, Baztandarren Biltzarra, Baztango Mendigoizaleak, Eguzkilore emakumeen elkartea, Erratzuko kultur elkartea, Lekaroz eta Gartzaingo gazteak, Elizondoko Gaztetxea, Metaziri aldizkaria, Jo ala jo kultur elkartea, AEK-ko irakasleak eta Baztango Amnistiaren Aldeko Mugimendua.