Udalak Sebastian Piñeira Txileko presidente berriari babesa eman izana salatu du Baztango Ezker Abertzaleak ohar bidez. Amaren aldetik Baztanen erroak dituena da Piñeira eta Udalak, NaBairen ekimenez eta UPNren babesarekin, zorionak eman dizkio.
Ezker Abertzaleak kritikatu duenez, «Piñeira multimilioiduna eta eskuindarra da, Pinotxeten diktadura aldian aberastu zena, eta hortan, zerikusia izanen du seguraski bere anaia Jose Pinotxeten gobernuan ministro aritu izana». Hauteskundeotan Pinochet-zaleen babesa hartu zuela ere nabarmendu du Ezker Abertzaleak.
«Piñeiraren lana Txileko herriaren alde izanen dela erraten da Udalaren idatzian, eta horrekin ez dugu inolaz ere bat egiten», dio oharrak, «Piñeirak ordezkatzen dituen klase interesak Txileko oligarkiarenak baitira, eta bere programa politikoa langileriaren eta herriko sektoreeen kontrakoa da». Bide honetan, Maputxe herriak jasaten duen «zanpaketa» indartu eginen dela ere iritzi dio Ezker Abertzaileak.
Udalaren erabakiaren harira, «NaBaik duen noraez ideologiko eta politikoa agerian» utzi nahi dutela adierazi dute oharrean, eta Txilen baztandar jatorria duten langile eta herritar arruntak agurtu dituzte.