Lekarozko kolegioaren ingururako proiektu berritzailea aurkeztu du Nafarroako Gobernuak: enpresa campus bat jarri nahi du kultur, hezkuntza eta ekonomi ekimenetarako. Hala, hizkuntza ikasteko murgiltze zentro bat, enpresa parke bat eta harrera eremu bat eraikitzea da asmoa.
Proiektua urtarrilaren 8an aurkeztu zuen Alvaro Miranda Ekonomia eta Ogasun kontseilariak, Segimendu Batzordearekin Lekarozen egindako bileran. Proposamena ideien lehiaketan irabazi duen ASOARQ arkitektu elkartearena da. Honen arabera, 120.868 m2ko eremu bat berriz urbanizatuko litzateke eta eremu horretan 34.000 m2 eraiki. Espazio berri horretan enpresa campus bat jarriko lukete, berdegune «aunitz eta dentsitate guttikoa». Oinezkoentzako eta txirrindularientzako ibilbideak ere iragarri dituzte.
Hiru jarduera
Hiru jarduera planteatu ditu Gobernuak: eliza ingurua berriz eraikitzea harrera gune gisa (11.695 m2), baratze zaharrak enpresa parke bihurtzea (49.691 m2) eta ikuilu zaharren ingurua berriz urbanizatzea, hizkuntza ikasteko murgiltze zentro bat jartzeko (59.4822).
Elizaren inguruan, alde batetik, kapera zaharberritu nahi dute, erabilera anitzeko espazio batean bihurtzeko; eta bertzetik, eraikin horren ondoan, ekipamendu bat paratu nahi dute. Horrez gain, mintegi bat eraiki nahi da, egoitza administratiboa, ekonomia ekimen berrien mintegia eta zerbitzu osagarrietarako.
Eraikin berriekin ikastetxe zaharraren arkitektura estiloa ere birmoldatuko lukete.
Enpresa parkearen eremuan zumardi bat egin nahi dute erdian, eliza ingurutik hasita.
Hizkuntzak ikasteko zentroa, enpresa parkea eta harrera eremua egin nahi ditu
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun