Urteko lehen batzarra egin zuen Elizondoko herriak Errege Egunean, eta azaldutako datuen arabera, 31.382 euroko irabaziekin akitu zuen 2009a. 121.820 euroko dirusarrerak izan zituen eta 90.438 euroko gastuak. Gastuen artean, handiena, Santiago besten antolaketa izan zen, 61.632 euro: «13.667 euro plazako musika, 11.658 karrikako animazioa, 6.954 haurren ekitaldiak eta 5.124 Mendiarte graffitiak», erran zuen Xabi Torres alkateak. Besten aurrekontua «nabarmen» jautsi dela ere azpimarratu zuen, «kuadrillen parte-hartzeari esker». Programako publizitatearekin 12.370 euroko sarrerak izan ziren; Udalak 10.890 euro jarri zituen eta postuak jarri zituztenei 3.870 euro kobratu zitzaizkien. Bertze sarrerei dagokienez, herritarren kuotekin 38.465 euro lortu ziren, oraindik 204 errezibo (7.878 euro) kobratzeko izan arren; ferietan 21.864 euroko sarrerak izan ziren eta ortzegunetako merkatuan 4.382 eurokoak. Hilerriko gastuen bigarren seihilekoari dagozkien 2.103 euro gelditzen dira orain ordaintzeko, baina hilerriak 2.800 euroko superabita eman zuen iaz. Aipatu, hilerria kudeatzen duen Cemendena enpresarekin bi urterako luzatuko dela kontratua.
Superabitarekin zer egin galdetuta, zenbait proposamen aditu ziren: herriko jabetza guzien paperak egin, Herriko Etxearen teilatua moldatu, Iriarte frontoia moldatu, musika bandak entsaiatzen duen aretoa moldatu...