Santiago eta Jaime Urrutia karriken artean, plaza berri bat sortzeko asmoz, Udala lehenbiziko pausuak ematen hasi da. Hala, lehenago Hotel Lazaroren garajea zena desjabetzeko tramiteak hasi ditu. Hotel Lazaro (Santiago Karrikan) eta Arizkunenearen (Jaime Urrutia Karrika) artean plaza berria kokatuko dute. Horrekin batera, plaza berria egiten denerako, Nafarroako Kutxaren lorategia zena ere murriztu da lurrazpiko edukiontziak paratzeko.
Foru Plaza berritzearekin batera, Eliza ondoko haur-parkean, aparkalekua egiteko asmoa dago, gaur egun, plaza ondoan dagoena ordezkatzeko. Eliza ondoko aparkalekua egiteak, ordea, haurren gurasoen kezka piztu du, nahiz eta Udalak haur-parkea mantenduko dela erran.