Berrikuntzekin hasiko du denboraldia Lindutx Baztan BKTk. Eskubaloiko Lehen Maila Nazionalean ari den emakumezkoen taldeak fitxaketa berriak egin ditu, baina aldi berean, urteetan taldean egon diren jokalari batzuek taldea utzi dute.
Gabriella Horvath hungariarra eta Angel Dumitrita errumaniarra dira jokalari berriak. Biak lehen lerroan ariko dira. Gainera, joan den urtean fitxatu zen Talita Daiana brasildar atezainari kontratua berritu dio taldeak. Bertzalde, jubenilen mailatik igota hiru jokalari ariko dira denboraldi honetan talde nagusian: Naiara Oteiza oronoztarra eta Nerea eta Amaia Mortalena arraioztarrak.
Bajak ere izan dira taldean, hiru baztandarrenak eta bi atzerritarrenak: Josune Iturzaeta elizondarra eta Garazi Arretxea eta Ainara Unanua gartzaindarrak ez dira taldean izanen denboraldi honetan. Ildiko Valaczkai eta Kinga Toth hungariarrak ere ez.
Bertzalde, 2009/2010 denboraldian ere, Lindutx Baztan eraikuntza enpresa izanen da BKTren babesle nagusia. Hitzarmena irailaren erdialdean sinatu zuten bi aldeek, BKTren izenean Belen Urrutia lehendakariak, eta Lindutx Baztanen izenean Aitor Nuñez, Xabier Iparragirre eta Iñaki Unanuak. Argazkia ordukoa da.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun