Zoritxarreko edo ustekabeko istripu batean, 400 litro gasolio isuri dira Baztan ibaiara, Elizondotik pasatzerakoan. Kamioi bat Santiago Karrikatik zihoala, ur zulo bateko estalkia edo tapa jo eta gasoil biltegia hautsi zuen, eta bertan zuen gasolio guzia errekara isuri zuen, Arizkunenea gibeleko aldetik kanporatuz.
Ezbeharra joan den abuztuaren 29an gertatu zen, goizean 9:00 baino lehen. Foru Polizia, Oronoz-Mugairiko suhiltzaileak, Ingurumen teknikariak eta EcoIruñako langileak istripua gertatu zen tokira hurbildu ziren, eta isurketak eragin zezakeen kaltea ahalik eta ttikiena izateko euspen-barrerak paratu zituzten.