Jaime Urrutia karrikako merkatari batzuk arrenkura azaldu dute Balleko Udalak trafikoa arautzeko hartutako erabakiek sortutako ondorioekin. Zehazki, Beltzunegi arropa dendak, Maite lentzeriak, Perez mobledendak, Adela janaridendak eta Nafarpress liburudendak Udalari aurkeztutako idatzi batean adierazten dutenez, «Udalak arauak aldatu zituenetik, sekula baino bisita gutiago dituzte». Arau hauek, Istikonea etxetik (Adela) Kuartelekozelaia (Martintxo) bitartean autoa uztea debekatzen dute, denda hauetako bezeroei aparkatzea galeraziz. Dendarien ustez, inguruan bertze aparkalekurik ez dagoenez, bezeroek nahiago dute autoa uzteko errextasun gehiago dituzten bertze lekuetara joan. Modu berean, dendariek uste dute karrika honetako trafikoa ez dela aparkatzea debekatzeko bezain handia. Hori dela eta, aldaketa hauek berriz aztertzea eta lehengo egoerara itzultzea eskatu dute dendariek. Udala, aztertzen ari da merkatarien eskaria.