Apirilaren 8an egin zen batzarrean aukeratu zuen Arraiozek azkenean bere alkatea: Cristobal Bengoetxeak hartuko du, lau hilabeteko atzerapenarekin bada ere, Juan Bautista Oteizak utzitako lekua. Bengoetxea izan zen aurkeztutako hautagai bakarra. Hiru laguntzaile izanen ditu, Mardea eta Urrutia auzoetako ordezkari bana eta baserrietakoa bertzea. 30 arraioztar bildu zuen batzarrean Bengoetxeak lanean hasteko gogoa erakutsi zuen: Bere lehendabiziko helburuak, baserrietako pistak moldatzea eta gero, kanposaindua moldatzeko laguntzak lortzen saiatzea. Modu berean, auzolanaren garrantzia azpimarratu zuen: «Balleko Udalak lanak egiteko materiala jartzen du, baina ez eskulana. Honek ere dirua balio du, eta horixe da preziski, guk ez daukaguna».