Baztango eta Baigorri aldeko txalapartariek antolatuta, txalapartarien besta eginen da, aurten hirugarren aldiz, igande honetan, irailak 6. Baztan eta Baigorri inguruko txalapartariak elkartzeko helburuarekin, lagunartean sortu zen ideia izan zen, eta duela hiru urte, erdi bidean egin zuten hitzordua: Izpegiko lepoan. Geroztik ez du hutsik egin ospakizunak.
Paxkal Indo antolatzaileak ttipi-ttapari adierazi dionez, ez dute egitarau finkorik zehaztu, eta txalaparta horrela ulertzen dutelako librean utzi nahi izan dute eguna: «guk eguna eta tokia emanen dizkiogu jendeari». Dena den, Izpegin, 9:00etan egin dute hitzordua. Goizean mendian ibiliko dira eta mendi tontor batean txalaparta bat ere kokatuko dute. Eguerdian, 14:00etan Izpegira bueltatuko dira eta Baigorriko Ikastolaren alde «sos batzuk biltzeko», taloak jateko aukera izanen da. Arratsaldean txalaparta doinuak nagusituko dira.
Aurtengo berrikuntza Parisko talde baten bisita izanen da. Txalapartarien lekukotzak hartzeko asmo omen dute eta baliteke Izpegin grabaketak egitea.