Eskolak «herrikoak, euskaldunak eta publikoak» direla aldarrikatzeko Urdazubi, Zugarramurdi, Amaiur, Azpilkueta, Erratzu, Arizkun, Gartzain, Irurita, Ziga, Almandoz, Arraioz eta Oronozko eskoletako gurasoek antolatuta, eskolen besta eginen da igande honetan, urriak 5, Amaiurren. Ekitaldiak antolatzen Baztan balleko udalaren laguntza izan dute eskola ttikietako gurasoek.
Egitarau zabala
11:00etan Arizkungo Lamirritan elkartuko dira oinez Amaiurrera joateko. Behin harat ailegatuta, 12:30ean herri kirolak izanen dira Amaiurko plazan. 14:00etan bazkaria eginen da, norberak etxetik eramandakoarekin. Arratsaldean, 16:00etatik 18:00etara dantzaldia izanen da.