Baztango Udaleko Euskara Zerbitzuak, aste honetan abiatu ditu plaza jostaldiak. Ekimen honen asmoa gurasoak eta haurrak elkarrekin jolastea da eta horretarako begirale batzuk ibiliko dira herriz herri. Baztango Euskara Zerbitzuaren helburua ongi pasatzea da, jolas eta kanta berriak ikastea, eta hori dena gure hizkuntza erabiliz, euskaraz. Plaza jostaldia astean behin eginen da jolastoki bakoitzean, beti ere, arratsaldeko 16:30ak aldera. Astelehenetan, Arizkungo eskola ondoan bilduko dira, asteartetan Oronozko eskola ondoan, asteazkenetan Elizondoko ikastola ttikiaren parkean, ortzegunetan Elizondoko San Francisco eskola ondoan eta ortziraletan, Iruritako eskola ondoan. Maitza akabaila arte eginen dira Plaza jostaldiak, baina erantzunaren arabera luzatu ere egiten ahal da.
Euskararen erabilera emendatzeko
Raul Lopez, Baztango Euskara teknikariaren erranetan, “neska-mutikoak ikastetxetik ateratzen direnean, normalki gurasoak eta haurrak ondoko parkean edo eguraldi txarra egiten badu, frontoian biltzen dira. Gurasoak kontu kontari eta haurrak jolasean aritzen dira. Kasu aunitzetan gurasoak kontu kontari erdaraz aritzen dira elkarren artean, eta nahiz eta umeari euskaraz egin, hauek ohartzen dira gurasoek zer hizkuntza erabiltzen duten. Horrekin hizkuntza erabiltzeko araua ezartzen diegu umeei. Hori hausteko eta euskararen erabilera emendatzeko antolatu dugu plaza jostaldia”.
Arantxa Gamio berroetarra begirale
Berroetako Arantxa Gamio ariko da begirale gisara, eta beharraren arabera, Haur Eskolan aritzen diren bertze bi begirale izanen dira, “honelako gaietan esperientzia dutenak”.