Herri kontsultaren aldeko manifestazio jendetsua

Erdiz Bizirik plataformak deituta, manifestazio jendetsua —2.000 lagun antolatzaileen arabera— egin zen azaroaren 10ean Elizondon, Magna enpresak Erdizen egin nahi duen harrobiari buruzko erreferenduma egin dezaten eskatzeko. Antolatzaileak pozik ageri ziren manifestazioak izandako harrerarekin. 17:00etan abiatu zen Elizondoko plazatik eta karriketan barrena ibili ondotik berriz bueltatu ziren plazara. Aziendarik ere ez zen falta izan, zaldiak, behiak eta ardiak han izan baitziren. Plazako ekitaldian, plataformako kideek Nafarroako Gobernuko Ingurumen Departamentuari «arduraz» jokatzeko eskatu zioten, eta Baztango Udalari, berriz, «tranpak eta gezurrak alde batera utzi eta baztandarren borondatea errespetatzeko». Bide batez, sinadura bilketa martxan paratua dela ere gogorarazi zuten antolatzaileek, eta horretarako baztandarrek Herriko Etxean sinatu beharko dutela.