Larunbat honetan, hilak 3, Arizkungo Gamioxarrea etxean Kirikoketa egunaren edizio berria eginen da Jo ala Jok antolatuta. Hala, Gamioxarrea inguruan eta herrian garatuko den egitaraua prestatu dute. 10:00etan hasiera emanen diote egunari, sagardoa egiteko prozesua hasiko da: sagar bilketa eta garraiatzea, sagar-jotzea, patsa-estutzea eta gainerako lanak. 10:30etik aitzinera, herrien barnat txistulariak, erraldoiak, Sasternea etxean pintura erakusketa, artisauak, marrakuluak… izanen dira. Aldi berean Gamioxarrean hiru atal bereizi dituzte: beheitian, kupeletegian, barra paratuko da eta pintxoak zerbitzatu eta pantalla haundi baten bidez sagardogileen lana segitu ahal izanen da; lehenbiziko pisuan dolarea eta hirugarren toki batean erakusketa izanen da, eta Nafarroako sagardoa dastatzeko aukera. Haurtzaindegi zerbitzua ere izanen da. 14:00etan bazkaria eginen da Iñigo Izagirre, Jon Barberena eta Jon Elizegi bertsolariekin. 17:00etan txalaparta emanaldia izanen da, mota desberdinetako txalaparta hotsak adituko dira: Baigorrikoak, Donapaleukoak, Ziburukoak, Gallartakoak, Errotxapeakoak... Ilunabarrean dantza herrikoiak izanen da; 19:00etan bokatak eta akitzeko kontzertua Kalapite taldearekin.