Gora beheraz beteriko urtea izan da Erregional Mailan jardun duen Baztan Kirol Elkartearentzat. Denboraldi hasieran helburu nagusia Preferente mailara igotzea zen, azken bi urteetan igoeraren ateetan gelditu ondotik. Talde ederra bazen ere, baja eta lesio larriek eraginda, jokalari kopurua, eta ondorioz, entrenamenduen kalitatea jautsi ziren. Guzti honi, liga hiru hilabetez erabakitzen dela gehitzen badiogu (lehen fase hau eta gero erabakitzen da zein taldek jokatuko duten Preferenterako igoera fasea) aurtengo denboraldiaren hasiera eskasa ulergarriagoa egiten da. Azkenean, lehen fasea igoera jokatzea ahalbidetzen zuten postuetatik puntu bakar batera gelditu ziren baztandarrak. Kolpe gogorra izan zen, taldea moralki arras ukitua utzi zuelarik. Hortik aurrera, Nafarroako Kopa jokatzea egokitu zitzaion. Hasiera batean taldeak ez zuen aparteko motibaziorik erakutsi konpetizio honetan, baina pixkanaka, eta jokalariak berreskuratzen joan ahala, forman jartzen hasi ziren eta benetan zuten maila ematen.
Garrantzi handia izan zuen ere talde jubenilak bere liga amaitu izanak, talde horretako hainbat jokalari lehen taldearekin entrenatzen eta jokatzen hasi baitziren. Behin normaltasunera bueltatuta, Kopako lehen fasea multzoburu amaitu zuten, eta ondotik, final laurdenak eta finalerdiak nahiko erraz gainditu zituzten Mirandako Castillo eta Iruñeko San Ignacio taldeen aurka hurrenez hurren. Horrela, gan den larunbatean finala jokatzeko aukera izan zuen Los Arcoseko Urantzia taldearen aurka. Ia 300 pertsona bildu ziren Taxoaren partidua ikusteko. Baztandik jende kopuru andana hurbildu ziren, zuzendaritza batzordeak jarritako autobusa ere lepo bete zelarik.
Partidari dagokionez, tentsioz beteriko partida izan zen, eta jokamolde ezberdinak erakutsi zituzten, alde batetik baztandarren gaztetasuna, eta bertzetik Urantziakoen esperientzia. Hasiera-hasieratik, baztandarren nagusitasuna argi gelditu zen, hegaletatik nahi zuten bezala arriskua sortuz, eta atzealdean inolako arazorik izan gabe. Hala ere, lehen zatian ikusi zen gol bakarra, landutako korner baten ondorioz erdietsi zuten baztandarrek Patxi Barberenaren burukada bikain baten bitartez. Partida kontrolpean bazegoen ere, nagusitasuna markagailura eraman beharra zegoen, baina ez zituzten izandako aukerak gol bihurtu lehen zati horretako azken minutuetan. Atsedenalditik bueltan, Urantziak arrisku gehiago hartu zituen markagailua irauli nahian, eta Baztanek ederki baliatu zuen aukera hori kontraerasoan bertze bi gol egiteko. Ioritz Mitxeltorena eta Aletxu Mota izan ziren besta baztandarren ikusleen artera eraman zutenak. Hortik aurrera ez zen aparteko gauzarik gertatu. Urantziakoek etsita, partida zakartzen eta berotzen saiatu baziren ere, baztandar gazteak ez ziren probokazioetan erori eta abantaila mantentzen saiatu ziren. Azkenean, markagailua bere horretan gelditu zen, eta epailearen azken txistu hotsarekin batera, besta eta algara nagusitu ziren baztandarren artean. Amaiera borobila izan zen erdipurdi hasitako denboraldi batentzat, batez ere jokalarien jarrera saritzen eta hurrengo denboraldiari begira aparteko motibazioa ematen duena.