Balleko Udalak kalifikazio berria eman dio Arraiozko Nazta inguruan dagoen Gillermobelai zelaiari. 48.644 metro koadro dituen belagia abeltzaintza erabilerarako kalifikazioa zuen eta hasiera batez onartu den kalifikazio berriaren arabera, zerbitzuetarako bideratuko da. Inguru horretan 50 lanpostu sortuko omen dituen merkataritza gunea ezartzeko asmoa du Urtelor elkarteak, supermerkatua, galeria komertziala eta gasolindegiarekin. Urtelorek egindako bideragarritasun planaren arabera, Baztan, Bertizarana eta Malerrekako 12.000 bizilagunek erabiliko lukete merkataritza gune berria. Lehen urtean 2,78 milioi euroko negozio-bolumena izanen luke eta bortz urteren buruan 9,6 milioitara ailegatuko litzateke.