Almandozko San Pedro elizaren 50. urteurrena ospatu zuten azaroaren 12an. Parrokiak omenaldia egin zien eliza berriaren eraikitzean lagundu zutenei. Joan den mendearen erdialdean, eliza zaharra egoera kaskarren zelako arriskutsua bilakatu zen bertan edozein ofizio egiteko. Hori dela eta, garaiko apeza, Norberto Iturralde zena buru zutela, eliza berri baten eraikitzea erabaki zuten herritarrek. Lehen harria 1953ko irailaren 13an pausatu zuten eta hiru urte beranduago inauguratu. Gaur egungo apezak, Ramon Apezetxeak dioenez, oparoak ez ziren garai haietan herritarren laguntza beharrezkoa izan zen eta ez omen zen makala izan.
Hauen eskertzeko antolatu zuten omenaldi egun berezia egunsentiko kantuekin hasi zuten, ondotik eukaristia egin zuten Elizondoko abesbatzak kantatua. Abesbatzak kontzertua ere eskaini zuen meza eta gero. Eguerditan aperitiboa egin zuten herritar guziekin.