Ikasturte berria indarrez eta gogoz hasteko, Arraiozko Eskolako Guraso Elkarteak besta ederra antolatu du igande honetarako, irailak 22, Urdazubi-Zugarramurdi eta Baztango herrietako eskolen besta. Duela sei urte hasi ziren topaketa hau egiten, herrietako eskoletan ikasten duten ikasleak eta hauen familiak elkarrekin harremanetan jartzeko helburuarekin, eta gisa honetara, «gure eskolak publikoak, euskaldunak eta herrikoiak direla aldarrikatzea».
10:00etan herriko txistulariek ongietorria eginen dute. Ondotik, mendi ateraldia eginen dute Auzpe aldera. Antolatzaileek diotenez, sei urtetik beherako umeek herrian barna ibilalditxoa egitea komenigarriagoa izanen da. Ondotik, Laxoako plazan, umeendako tailerrak izanen dira: aurpegi margotzea, estanpazioa... 13:00 aldera trikitixa emanaldia izanen da leku berean. Eguerdian, bazkaria eginen dute frontoian eta postrea eta kafea ere izanen dira. Ondotik, Santxotena musikariak giroa alaituko du. Arratsaldean puzgarriak izanen dira BKZren eskutik.