Doneztebeko Erreka elkarteak laugarren aldiz antolatutako Bortz Kirol txapelketako finala jokatuko dute Narbarteko Julen Iriartek eta David Albiasuk abenduaren 13an, larunbatean 12:30ean hasita Doneztebeko Ezkurra pilotalekuan. Lehen faseko partida guztiak irabazi zituzten Narbarteko bi pilotariek, baita finalerdiak ere. Bortz Kirol txapelketak txapeldun berria izanen du.

«Abisu berria eman arte, Endarlatsa eta Doneztebe arteko zatian Bide Berdea itxita dago». Halaxe iragarri du Uraren Bailarak, Bidasoko Bide Berdearen erakunde kudeatzaileak. Izan ere, azkeneko egunotan hainbat tokitan lur erortzak izan dira eta, ondorioz, bidea trabatuta dago. «Itxitako tartera sartzen dena, bere erantzukizunpean» sartuko dela ohartarazi dute. «Erabiltzaile guztiei eskatzen diegu abisu seinaleak errespetatzeko».