Ondarea bizirik goiburupean Ondarearen Europako Jardunaldiak ospatu dituzte Nafarroako 52 udalerritan, 175 jarduera ingururekin. Eskualdean, Urdazubiko Alkerdiko leizean berriki topatu dituzten hartz arraren eta emearen buru-hezurrak ikusteko eta hari buruz gehiago jakiteko aukera izan dute irailaren 30ean, Asier Gomez paleontologoak eta Euskal Herriko Unibertsitateko irakasleak Urdazubiko kultur etxean eman duen solasaldian. Gero, Alkerdiko historiaurreko marrazkiak bisitatzeko aukera ere izan zen, doan.
Urdazubiko leizeko Goio Hualdek aipatu digunez, «aspaldian, orain dela zenbait mila urte, hartz hauek gure mendietan bizi ziren. Neguko hotz handietatik babesteko Alkerdiko leizean xoko bat harrapatu zuten, han berean hil ziren, eta orain dela guti aurkitu dituzte. Gaur egun, hezur hauek ikertzen ari dira eta laster Atapuercako laborategi batera eramanen dute. Bitartean bere garai bateko etxean ikusgai izanen dugu, Urdazubin».
Monica Villalba paleontologak azaldu zuenez, «hartz ar eta eme horien buru-hezurraz gain, hiena batena eta hainbat ugaztunena topatu dira Alkerdin».