Neskato kozkorra zela hasi zen eskean: «ustez, 8 urterekin hasten ginen, eta hiru taldetan banatzen ginen. Gaur egun, bi talde daude. 8-16 urte bitartekoak eta 16 urterekin helduen taldean sartzen gara. Beraz, urte batzuk eramaki ditut inauterietan». Onartu digunez, «giro gehiago» izaten dute baserrietan ibiltzen direnean, «freskoago egoten garelako. Herria egiten dugun egunean hirugarren eguna izaten dugu, aitzineko egunetan egindako bestaren ondorioak somatzen ditugu, eta normalean lasaiago ibiltzen gara». Baina giro gehiago ala guttiago izan, hori da Estitxuri gehien gustatzen zaiona: «inauterietan etxez-etxe ibiltzen garelarik sortzen den giroa eta urte guzian ikusten ez dugun jendearen egoteko aukera izatea». Bere irudiko, hori «arrunt polita» da eta garbi utzi digu oraindik ez duela eskea uzteko asmorik: «oraino ibiliko naiz», dio irriz.
Urte hauetan guztietan mozorro saila jantzi ditu, eta «denak» gustatu zaizkiola erranagatik, bat aukeratzekotan gan den urtekoa egin du, «geishaz egin ginenekoa». Aurtengo mozorroa ez duela prest dio, eta aitortu digunez, «gehienean azken momentukoak izaten gara». Hala ere, aurkituko du oraindik zerbait eta besta goizetik hasita, hantxe ibiliko da lagunartean, berak dioen bezala, «gorputzak irauten duen arte».