Puntu.eus fundazioak antolatutako Kaixomundua webguneen garapen lehiaketan parte hartu dute Lekaroz BHIko 2. batxilergoko ikasleak, Informatika eta programazioa ikasgaian, eta lau ikasle sarituak izan dira. Joar Mariezkurrena Flores, Oihan Sarratea Etxekolonea, Paula Zabala Sarasola eta Lara Ribeiro Cordeiro ikasleek sortutako errekakirolelkartea.eus webgunea izan da garaile.
Joan den ortziralean, maiatzaren 3an, EITBren Bilboko egoitzan izan zen sari banaketa eta bertan izan ziren lau ikasleak Josune Ballarena Urroz irakaslearekin.
Kaixomundua lehiaketa
Gazteen artean gaitasun digitalen ezagutza sustatzea eta euskarazko eduki digitalak sortzea du helburu ekimenak. Lehiaketaren bosgarren edizioa izan da aurtengoa eta inoiz baino arrakastatsuagoa izan da, 54 ikastetxek eta 1.334 ikaslek parte hartu baitute DBHko eta Batxilergoko kategorietan.