Hitzetatik ekintzetara jo eta herri-galdeketa antolatu eta gauzatzeko sortu ziren Bortzirietako Eman Bortzekoa eta Mendialdeko Gure Esku Dago Elkarteak. Duela sei hilabete inguru egin zituzten elkarteen jendaurreko aurkezpenak eta eskuz esku, ilusioa ardatz hartuta, bete dute erronka: Ekainaren 18an eginen dira eta herri-galdeketak.
Orain arteko bidean, elkarlana izan da gakoa eta baita herritarrek galdeketari erakutsi dioten babesa ere. Galdeketa egin ahal izateko beharrezko sinadura kopurua jaso ondotik, galdera adostea izan zen hurrengo pausoa, prozesu parte-hartzaile eta irekia martxan jarriz. Galdera ahalik eta modu zabalenean adosteko, herriz herri, lagunartean, familian, lankideekin, inguruko jendearekin modu ezberdinetan biltzeko aukera izan dute, denen iritziak eta proposamenak jasoz.
Erantzun beharreko galderak
Hala, erantzun beharreko galderak desberdinak dira Bortzirietan eta Mendialdean. Nafar gisa, Euskal Herri burujabe bateko herritarra izan nahi duzu? galderari erantzunen diote Bortzirietan. Mendialdean, berriz, bi izanen dira galderak: Nahi al duzu Nafarroako herri tarrok gure etorkizun politikoa modu askean erabakitzea? eta baiezkoa bada, nahi al duzu Euskal Herri libre bateko herritarra izan?.
16 urte eginak eta erroldatuta
Herri galdeketaren antolatzaileek galdeketak berme guztiak izatea nahi dute eta horregatik zorrotz eginen dute prozesu guztiaren jarraipena. Ez dira ohiko hauteskundeak izanen baina bozketaren prozedura antzekoa izanen da, aldaketa ttiki batzuekin. 16 urtetik gorako herritar guztiek izanen dute galderari BAI edo EZ erantzun edo boto zuria emateko aukera. Herritarrek erroldatuta dauden herrian eman beharko dute botoa. Udalerri bakoitzak mahai bana izanen du eta Alkaiagan eta Suro auzoan ere jarriko dute bana.
Beharrezko agiriak
Botoa emateko orduan ezinbestekoa izanen da norbere burua identifikatu eta herri horretan bizi dela egiaztatzea. NAN agiria edo pasaportea erabili ahal izanen dira eta horren ordez gida-baimena edo EHNA aurkezten dutenek udaletxeko errolda agiria ere aurkeztu beharko dute.
X batez adierazi
Botoa emateko orduan etxez etxe banatutako gutunazal eta botoak erabiltzeko aukera izanen da. Bestela, bozkaleku bakoitzean ere izanen da paperak hartzeko aukera. Hori bai, boto-papera etxetik eramanda edo bozkalekuan hartuta, BAI edo EZ erantzun nahi dutenek X bat idatzi beharko dute aukeraren laukitxoan X bat BAI erantzunari, edo X bat EZ erantzunari.
Aldez aurretiko bozka
Ekainaren 18an, egun osoz, 09:00etatik 20:00etara izanen da bozkatzeko aukera. Igandea seinalatu dute egutegietan Gure Esku Dago dinamikako kideek baina aldez aurretik ere, izaten ari da bozka emateko aukera. Herri gehienetan astean zehar bozkatzeko aukera izan da eta oraindik ekainaren 16an, ortziralean, izanen da horretarako aukera Lesakan, Arantzan eta Beran, 19:00etatik 21:00etara.
Antolatzaileek ez dute errolda ofizialik, baina sistema informatiko bat erabiliko dute pertsona batek bi aldiz bozkatzen ez duela bermatzeko. Horrekin batera, herri-galdeketetan jarraitu beharreko prozedura aztertu eta galdeketa egunean zuzen betetzen dela egiaztatzeko, kontrol batzordea, jarraipen batzordea eta begirale taldea ere ariko dira lanean.
Emaitzak biharamunean
Herriz herriko emaitzen berri erran.eus atarian izanen duzue biharamunean eta baita ekainaren 29ko aldizkarian ere.