Ehiza plater hauetan uso klasikoaz gain, birigarroak, faisaiak, basahate galeperrak, eperrak, orkatza, basurde eta oreina dastatzeko aukera izanen da, gure gastronomiako osagai ezagunez lagundurik: onddoak, lekak, piperrak… eta bukatzeko, eskualdeko esneki tipikoak eta beste postre zoragarriak ere.
Nafarroako ardoak plater hauen osagarri onak dira. Aurten ere, Iñurrieta upategi nafarrak, eta Pirineos Exdim eta Urauli enpresek jardunaldi hauetan laguntzen dute, Nafarroako Gobernuarekin batera. Oroitarazi ere jatetxe hauetako batzuk abendu hasierara arte luzatzen dutela beraien ehiza eskaintza. Menuak 27 eta 40 euro artekoak dira.
Baztan-Bidasoa Turismoak kartel bat eta jatetxe guztiak biltzen dituen eskuorri bat argitaratu ditu. Eskuorri hauek, jatetxeetan eta informazio turistiko puntuetan eskuragarri egonen dira baita www.baztan-bidasoa.com webgunean eta sare sozialetan. Menu guztiak biltzen dituen eskuorria ere argitaratu du elkargoak. Material grafiko honetarako, orain arte eskualdeko margolari baten margolana erabiltzen zen. Aurten, ordea, iaz lehen aldiz antolatu zen argazki lehiaketako argazki irabazlea erabili dute, Javier Salaberriaren ‘Taco de ciervo’.
Argazki lehiaketa bigarren urtez
Hain zuzen, Ehiza Jardualdiko II. argazki lehiaketa ere antolatu da. Parte hartu nahi duenak jatetxe hauetakoren batera hurbildu, menua eskatu eta dastatuko duen platerei argazkiak atera eta info@baztanbidasoa.com helbidera bidali beharko du. Irabazleak Baztan-Bidasoko jatetxeren batean 2 pertsonentzako bazkaria dastatzeko aukera izanen du. Lehiaketaren oinarriak jatetxeetan eskuragarri izanen dira.
Solasaldia ere
Aurten Baztango Ehiza eta Arrantza Elkarteak ere bat egin du jardunaldiekin eta Baztan-Bidasoa Turismo Elkargoarekin batera ‘Kirola, Ehiza eta Gastronomia’ solasaldia antolatu du azaroaren 25ean, 19:30ean Iruritako Olari jatetxean.
