Azaroaren 28an, larunbatean 13:30ean eginen da Herriko Etxearen aitzinean
Urdazubi Elgarrekin Hautes Elkarteak, bertze kolektiboekin batera, elkarretaratze bat deitu du azaroaren 28an, larunbat arratsaldeko 1:30ean Urdazubiko Herriko Etxearen aitzinean, Dantxarineko obra batean azaroaren 25eko gertakariaren ondorioz suertaturiko biktimekin elkartasuna adierazteko. Senide, lagun eta lankideei elkartasuna eta babesa erakutsi nahi diete, lelo honekin: Lan istripu gehiagorik ez! Egia jakin nahi dugu.
Elkarretaratzearen bertze arrazoinetako bat, Urdazubi Elgarrekin taldeko Iñigo Imaz zinegotziak aipatu duenez, «langileen eskubideak defendatzea da, Nafarroako Administrazio Auzitegiaren ebazpenaren ondorioz ezeztaturiko lizentziaren ondorioz, lanak ez gelditu izana salatzearekin batera».
Lanak ez gelditzeko asmoa adierazi du alkateak, lizentzia bertan behera gelditu arren, eta jarrera hori oso larria dela uste du Urdazubi Elgarrekin taldeak.