Mozioak gogoratzen duenez, «20 urterekin zinegotzi aukeratu zuten Kotto eta bi legegintzaldiz aritu zen Berako Udaletxean lanean. Kultura, kirola, euskara, mendia eta ingurugiroari lotutako gaiak zituen gustokoen eta udaletxetik bultzada ederra eman zien hauei»
Hamar urte bete dira «arrazoi politikoak direla eta bigarren aldiz espetxeratua izan ondotik, bere ziegan bakarrik, isolatua eta behar zuen mediku arretarik gabe zegoela, bere kondenaren 3/4ak beterik izaki, hilik harrapatu zutela». Berako Udalaren agiriak dioenez, egoera politikoa aski aldatu da azken urteetan, baina estatuaren indarkeriak bere horretan dirau. Egoera hau ikusirik, Berako Udalek bere konpromisoa berretsi du bake eta normalizazio bidean beharrezko diren pausoak bultzatzeko. Horretarako zenbait neurri proposatu ditu, hala nola «euskal preso politikoek bizi duten salbuespen egoera behin-betiko bukatzea, eta dituzten eskubideak errespetatu daitezela. Sakabanaketa politikaren behin-betirako amaiera beharrezkoa da». Prozesua oztopatzea bertze helbururik ez duten erasoak amaitu daitezela ere eskatu du, «atxiloketek konponbidea saihestu bertzetik ez baitute egiten, eta horrek ondorio hagitz larriak ditu gure herriarentzat». Modu berean, etorkizuneko elkarbizitzaren mesedetan, udalarentzat beharrezkoa da «gatazkaren beroan gertatu diren eskubide urraketa guzien balantzea egitea, salbuespenik gabe. Soilik ETAren ekintzak aintzat hartzen dituzten kontakizun partzialek ez diote inolako mesederik egiten herri honi. Argazki osoa izan eta ikusi ahal izatea ezinbertzekoa da».