Uztailaren 8an hasiko dira txapelketak eta arpana soinua nagusituko da. Hasteko Nafarroako I.Mailako Arpana Txapelketa jokatuko da. Eskualdetik Arraiozko Xabier Urrutia eta Daniel Saldias ariko dira lehian, Josetxo eta Iñaki Barberena (Iraizoz), Julen Kañamares (Arostegi) eta Mikel Eugi (Beunza), Oier eta Imanol Kañamares (Arostegi), Esteban eta Martin Pikabea (Gerendiain) eta Adrian Berruezo (Ibero) eta Alberto Oteizaren (Larrageta) aurka. Etzanda jarritako kanaerdiko enborrari 14 epai eta zutikakoari 4 epai egin beharko dizkiote.
Segidan, Nafarroako Emakumezkoen Arpana Txapelketaren txanda izanen da eta bertan, eskualdeko bi bikote ariko dira: Nerea Sorondo eta Amaia Garcia beratarrak eta Aresoko Itxaso Onsalo eta Lesakako Xanta Sousak osatutako bikotea. Itziar Nuñez eta Ana Lopez (Lezaun) eta Ainhoa eta Ana Iraizoz (Elso) izanen dira beste bi bikoteak. Etzanda jarritako 45 ontzako enborrari 10 epai egin beharko dizkiote. Bukatzeko, Aizkora erakustaldia eginen dute Juan Jose Lopez eta Donato Larretxeak.