Herria hobe ezagutzea helburu duen Ezagutu dezagun Lesaka lehiaketa martxan da berriz ere Lesakan. Beti Gazte elkarteak, udalaren, Irain eskolaren eta Tantirumairu ikastolaren laguntzaz antolatutako lehiaketa, oraingo honetan ere, Lehen Hezkuntzako ikasleei bideratua izanen da. 30 galdera erantzun beharko dituzte eta erantzunak aurkezteko azken eguna apirilaren 26a, ortziralea, izanen da. Ez da derrigorrezkoa galdera guztiei erantzutea.
Parte-hartzaileek, orriak beteta, kultura@betigazte.net helbidera bidali edo Beti Gazte elkartearen egoitzako atean dagoen postontzian sartu beharko dituzte.
Parte-hartzaileak hiru kategoriatan banatuko dituzte: A (LHko lehen eta bigarren maila), B (LHko hirugarren eta laugarren maila) eta C (LHko bosgarren eta seigarren maila). Sariak izanen dira kategoria bakoitzeko lehendabiziko hiruentzat.